مرحبا ياطارقة باب القصيد ونون عينه
الضيوف انواع وانتي تستحقين الكرامه
ضيفة الصدر الوسيع اللي مايشعر بالسكينه
كون عند اللحظه اللي بين اذان وبين اقامه
اعرجي بي لين احصل فرصة العمر الثمينه
واتغانم.. غفلة.. التاريخ واطير منامه
القصيده نورها.. ساطع ونبرتها حزينه
وبركتها.. بـ المقام اللي رفع ربي مقامه
اليتيم اللي ربى مكه وهاجر لـ المدينه
بعد ماصلى عليه الله وسلّم في كلامه
اطيب الاخلاق خلقه واخر الاديان دينه
والحظيظ اللي يشاهد غرته يوم القيامه
خصه الله بـ الرساله والوحي بينه وبينه
واصطفاه وكلفه يفرق حلاله عن حرامه
يوم جاه الابتر اللي كلمته ماهيب زينه
نزلت فيه اية الكوثر وعوّد بـ الندامه
حكمة الله في حياته يوم ماعاشوا بنينه
تجبرك تشهد على صبره وتاقف لأحترامه
ابلجٍ كن القمر والشمس تطلع من جبينه
وكل.. مامر الطريق المظلم يبدد ظلامه
الامين الصادق ابن الصادقه وابن الامينه
والكريم ابن الكرام ابن المعزه والشهامه
بان جوده والسنين عجاف مافيها سمينه
لين خلّد من فعل يمناه فالتاريخ شامه
من.. كرامة نفسه وطيبة معاملته ولينه
يطعم.. الجايع وهو مايقدر يوفّر طعامه
استمرت.. سيرته وابولهب تبت يدينه
مايضره لو يحط الشوك من خلفه وامامه
يتهمونه بـ الضلال ويتهمونه بـ الضغينه!!
واحتواهم بـ التسامح والدعاء والابتسامه
ويوم زادوا في تماديهم وطمعوا في عرينه
بشره ربي بـ نصره قبل (لايشهر حسامه)
ماتحاشوا (ذو الفقار) الين سله في يمينه
وافتخر في جيشه القله وهو مرفوع هامه
يتشهد فوق سرج.. المرتجز والله يعينه
في سبيل.. الله مايبغي عروش ولا زعامه
ماتحس انه مثل باقي البشر مخلوق طينه
من تواضعه وحسن خلقه وطبعه واهتمامه
تاقت عيونه لـ رؤيتنا.. وبادلنا حنينه
بالتضرع في صلاة الله عليه وفي سلامه
اشهدن.. امة محمد كل (ابيهم فاقدينه)
ليتهم مايعرفون من.. النظام الا نظامه
ليتني لحقت عصره قبل لاتقفي سنينه
لين اقبّل وجهه الطاهر قبل تدفن عظامه
من رضى ربي على ابو بكر! يوم اصبح خدينه
وعاصر ابوفاطمه عن قُرب واسرع فـ التزامه
صحبته يسعى لها الداعي ويرفع راحتينه
وتكفي المسلم من الفخر بـ خواله وبـ عمامه
(الوحيد اللي بيشفع.. لـ امته ولـ تابعينه)
يستحق.. انك توقي سيرته ريش النعامه!
اكبر من المدح وانواع الشعر زينه وشينه
لونقوله لين يوم الحشر مايوصل مرامه
في مديحه كني اللي مبحر فوق السفينه
يبغي.. يختم البحر ولاوصل نقطة ختامه
اعذروني.. ي جماهير الشعر ومتابعينه
لين اواصل باقي المشوار وارجع بالسلامه
عندي ان علاقتي مع الرسول انها متينه
والقصيده من وسامة سيدي فيها وسامه
غير صلى الله على وجه النبي ي ذاكرينه
اليتيم اللي بـ بيشفع لـ امته يوم القيامه
